O Mercado Daquí Darredor arranca o venres 2 de xullo no aparcadoiro traseiro do Centro Comercial Montebalado

Mercado Daquí Darredor
Organizada pola asociación Darredor, en colaboración co Concello de Brión, trátase dunha feira con produtos labregos, artesanía, segunda man... que terá lugar o 1º e 3º venres de cada mes, de 18:00 a 22:00 h

A asociación Darredor, en colaboración co Concello de Brión, organiza o Mercado Daquí Darredor, unha feira que terá lugar os primeiros e terceiros venres de cada mes, en horario de 18:00 a 22:00 horas, no aparcadoiro traseiro do centro comercial Montebalado. O mercado contará con produtos da horta (frescos ou transformados), artesanía, segunda man, actividades para as familias... e botará a andar o venres 2 de xullo.

Dende a asociación Darredor apuntan que “o mercado nace con moita ilusión e gañas. Para empeza, imos poñelo en marcha os primeiros e terceiros venres de mes en horario de tarde, desde as seis ata as dez. Tentarase organizar todos os días algunha actividade para a familia, entre as sete e as oito da tarde”. De feito, o venres 2 de xullo está previsto realizar unha pequena ruta pola beira do río Pego para coñecer as plantas medicinais que hai na zona.

Haberá sombra en toda a zona do mercado e, en caso de choiva, trasladaríase ao interior do centro comercial, no mesmo andar. Nesta primeira edición están confirmados un total de 17 postos de produto labrego, artesanía e segunda man. As persoas da contorna que desexen participar no mercado poden dirixirse a daquidarredor@gmail.com ou por whatsapp ao 633 122 772.