A situación climatolóxica está a causar problemas de circulación polas estradas do municipio, sobre todo coas xeadas a primeira hora da mañá. O novo espallador de sal comezou xa a traballar na madrugada do pasado sábado.
O alcalde de Brión, Pablo Lago Sanmartín, explica que “no Concello xa contabamos cun espallador de sal de menor tamaño e tiñamos previsto comprar este novo no borrador dos orzamentos de 2021. Porén, diante das fortes xeadas que estamos a sufrir estes días, e diante da previsión da chegada da borrasca Filomena, decidimos axilizar os trámites e adquirir xa este novo espallador, que é máis grande e moderno co que xa tiñamos, para que poda entrar en servizo de inmediato”.
O novo equipamento reforza a maquinaria dispoñible no Departamento de Obras, que poderá traballar en dúas frontes ao mesmo tempo. Pablo Lago amosa “o noso máis sincero agradecemento aos veciños e veciñas de Brión que cos seus tractores nos axudaron nestes días a espallar sal e a retirar varios vehículos que se botaran fora da estrada por mor das placas de xeo. Ademais, agradecemos tamén a xenerosidade de varios empresarios de Brión que doaron unha importante cantidade de sacos de sal, nun tempo no que é un artigo difícil de atopar. Novamente, a veciñanza de Brión demostra por que somos un gran concello”.